დღეს, 3 ივლისს რუსთავის საქალაქო სასამართლოში საქმეთა ელექტრონული განაწილების სისტემის პრეზენტაცია გაიმართა. ღონისძიება გახსნა საქართველოს უზენაესი სასამართლოსა და იუსტიციის უმაღლესი საბჭოს თავმჯდომარე ნინო გვენეტაძემ.

სტუმრებს მიესალმნენ საქართველოს იუსტიციის მინისტრი თეა წულუკიანი და საქართველოს პარლამენტის იურიდიულ საკითხთა კომიტეტის თავმჯდომარე ეკა ბესელია.

საქმეთა ელექტრონული განაწილების სისტემის პრეზენტაციას ესწრებოდნენ საქართველოს იუსტიციის უმაღლესი საბჭოს მდივანი გიორგი მიქაუტაძე, იუსტიციის უმაღლესი საბჭოს წევრები, საქართველოს პროკურატურის, არასამთავრობო ორგანიზაციების, საერთაშორისო და დიპლომატიური კორპუსის და მედიის წარმომადგენლები.

თბილისის საქალაქო სასამართლოს ყაზახეთის უზენაესი სასამართლოს თავმჯდომარე კაირათ მამი სტუმრობდა. დელეგაციას იუსტიციის უმაღლესი საბჭოს მდივანმა გიორგი მიქაუტაძემ და თბილისის საქალაქო სასამართლოს სხვადასხვა კოლეგიის თავმჯდომარეებმა და მოსამართლეებმა უმასპინძლეს.

შეხვედრაზე, მხარეებმა ორმხირივი გამოცდილება გაუზიარეს ერთმანეთს, ისაუბრეს მიმდინარე რეფორმებსა და სასამართლოს წინაშე მდგარ გამოწვევებზე. ყაზახი კოლეგები დაინტერესდნენ მოწმეთა დაკითხვის ახალი წესითა და არასრულწლოვანთა მართლმსაჯულების კოდექსის სპეციფიკით.

სტუმრებმა შეხვედრის დასრულების შემდეგ ნაფიც მსაჯულთა დარბაზი და მოქალაქეთა მომსახურების ცენტრი მოინახულეს.

2017 წლის 24 ივნისს, იუსტიციის უმაღლეს სკოლაში მოსამართლეთა XXI რიგგარეშე კონფერენცია გაიმართა, რომელშიც მონაწილეობა 299 მოსამართლიდან, 279 მიიღო.
კონფერენციაზე დამსწრე მოსამართლეებმა, 2/3-ის უმრავლესობით, ფარული კენჭისყრით იუსტიციის უმაღლესი საბჭოს მდივნად გიორგი მიქაუტაძე (246 ხმა ) აირჩიეს. იუსტიციის უმაღლესი საბჭოს მოსამართლე წევრებად კი - ირაკლი შენგელია ( 259 ხმა), ირაკლი ბონდარენკო ( 256 ხმა), დიმიტრი გვრიტიშვილი (268 ხმა) და ვასილ მშვენიერაძე (243 ხმა).
მოსამართლეთა კონფერენციაზე, ასევე, ფარული კენჭისყრით, 2/3-ის უმრავლესობით, არჩეულ იქნა სადისციპლინო კოლეგიის წევრები - ამირან ძაბუნიძე (251 ხმა), თეა ძიმისტარაშვილი (263 ხმა) და ნიკოლოზ მარგველაშვილი (247 ხმა).

2017 წლის 14 ივნისს საქართველოს უზენაეს სასამართლოში გაიმართა საქართველოს მოსამართლეთა კონფერენციის ადმინისტრაციული კომიტეტის სხდომა, რომელზეც დამტკიცდა მოსამართლეთა კონფერენციისა და ადმინისტრაციული კომიტეტის სამდივნოს შემადგენლობა და მოსამართლეთა XXI რიგგარეშე კონფერენციის ჩატარების თარიღი - 2017 წლის 24 ივნისი, 11:00 საათი, იუსტიციის უმაღლესი სკოლა.

XXI რიგგარეშე კონფერენციის დღის წესრიგით გათვალისწინებულია იუსტიციის უმაღლესი საბჭოს ოთხი წევრის, იუსტიციის უმაღლესი საბჭოს მდივნისა და სადისციპლინო კოლეგიის მოსამართლე წევრების (სამი წევრის) არჩევა.

კონფერენციის მუშაობა იქნება საჯარო და გამჭვირვალე. კონფერენციაზე დასწრების მსურველმა პირებმა, არასამთავრობო ორგანიზაციებისა და საერთაშორისო მისიების წარმომადგენლებმა, ჟურნალისტებმა, კონფერენციის ჩატარებამდე ერთი დღით ადრე უნდა წარმოადგინონ კანდიდატურა.

აკრედიტაციისათვის მიმართეთ საქართველოს მოსამართლეთა კონფერენციისა და ადმინისტრაციული კომიტეტის სამდივნოს შემდეგ მისამართზე: ქ.თბილისი, ძმ.ზუბალაშვილების ქ. №32.

საკონტაქტო პირები: ნოდარ ბერიძე - nodari.beridze@supremecourt.ge; ტელ: 577 14 99 59; გულიკო ორთოიძე - guliko.ortoidze@supremecourt.ge; ტელ: 577 71 10 50

დღის წესრიგი იხილეთ თანდართული ფაილის სახით.