დღეს, 15 ივნისს, საქართველოს იუსტიციის უმაღლეს საბჭოს მოლდოვას წარმომადგენლობითი დელეგაცია ეწვია. დელეგაციის შემადგენლობაში იმყოფებოდნენ, მოლდოვას მაგისტრატურის უმაღლესი საბჭოს, უზენაესი სასამართლოს, არასამთავრობო ორგანიზაციებისა და სამეცნიერო წრეების წარმომადგენლები. შეხვედრა ჩატარდა საქართველოს ახალგაზრდა იურისტთა ასოციაციის ორგანიზებით.მოლდოვას დელეგაციას საქართველოს იუსტიციის უმაღლეს საბჭოს წევრი კახა კობერიძე, საქართველოს უზენაესი სასამართლოს თავმჯდომარის ბიუროს უფროსი ლაშა მაღრაძე და საქართველოს იუსტიციის უმაღლესი საბჭოს დეპარტამენტების ხელმძღვანელები შეხვდნენ.
შეხვედრის მიზანი მოლდოველი კოლეგებისთვის საქართველოში მიმდინარე სასამართლო რეფორმების გაცნობა იყო. ისაუბრეს საქართველოს იუსტიციის უმაღლესი საბჭოსა და საქართველოს უზენაესი სასამართლოს უფლებამოსილებაზე, საქართველოში სასამართლო რეფორმის მიმდინარეობის მთავარ მიმართულებებსა და რეფორმის ფარგლებში განხორციელებულ ღონისძიებებზე.
მოლდოველმა კოლეგებმა დადებითად შეაფასეს საქართველოში გატარებული სასამართლო რეფორმა, დეტალურად დაინტერესდნენ რეფორმის ცალკეული საკითხებით, რადგან აღნიშნული პროცესი მოლდოვაში მიმდინარეობს, ხოლო საქართველოს პრაქტიკა მათთვის მნიშვნელოვანია.
შეხვედრისას მოლდოველმა სტუმრებმა ქართველი კოლეგებისგან მათთვის საინტერესო ყველა კითხვაზე ამომწურავი პასუხი მიიღეს.